Son moitos os petróglifos que dan conta da importancia milenaria dos cabalos salvaxes na Galiza. As bestas limpan os montes, abren carreiros, preveñen dos incendios e protexen o gando doméstico de depredadores como o lobo. Porén, as eguas e os cabalos salvaxes tan característicos da nosa terra cada vez van a menos. A veciñanza das serras da Groba ou de Sabucedo ocúpanse, cos seus propios medios, das rapas ou curros para preservar este animal contra ameazas sanitarias, ambientais ou a proliferación de eucaliptais e eólicos.