A imaxe do que puido ter sido e non foi percorre estas semanas a mente das xentes do viño en toda Galiza. Os lumes de agosto tamén arrasaron hectáreas de viñedos no Ribeiro, en Monterrei, en Valdeorras ou na Ribeira Sacra, deixando unha paisaxe de verde e negro nesta vendima na que se distinguen figuras xeométricas e serpeos de lume. Hai consenso en que, malia o perdido, o agardado era unha afectación moito maior, aínda que haberá que esperar semanas, quizais meses, para medir a realidade. Concordan en que non foi un milagre: foi a terra traballada, o seu efecto cortalumes e a aposta por unha vida ligada á uva e á natureza, mentres o abandono arrodea as parcelas.